Umcwaningi Wethule Ubuciko Bobumba baseNingizimu Afrika, eMelika

BY: .

Click here for English version

UDkt Mathodi Motsamayi ongumcwaningi weSikole SezobuCiko wethule inkulumo engqungqutheleni ebihlelwe Umkhandlu kaZwelonke Wezemfundo kwezobuCiko boBumba, i-National Council on Education for the Ceramic Arts (NCECA), e-United States.

Le ngqungquthela, ebibanjelwe e-Duke Energy Convention Center e-Cincinnati, igqugquzela ubuciko bobumba ngokusebenzisa imfundo, ukwakha umphakathi, ukucwaninga, ugqozi kwezobuciko, izinhlelo, imicimbi, kanye nezincwadi zokweseka umkhakha kanye nemiphakathi.

I-NCECA iklomelise uMotsamayi ngesethulo sakhe, kanti uphinde wathola ukubhaliswa kwamahhala ukuze athamele ingqungquthela yowezi-2023, kanye nobulungu obujwayelekile be-NCECA onyakeni wekhalenda wezi-2023.

Ngowe-2018 wamenywa ukutba azokwethula inkulumo eNgqungqutheleni Yonyaka ye-NCECA eyayibanjelwe e-Pittsburgh, e-Pennsylvania.

Isethulo sakamuva sikaMotsamayi sigxile ekulandiseni ngendabuko yase-Afrika kanye nemifanekiso eyenziwe ngabesilisa nabesifazane ngokwezethulo zabo ngamasiko abo. Uhlole ubuciko bobumba buka-Rorke’s Drift bango-1970 obanikelwa e-UKZN ngumndeni wakwaBernstein. Iqoqo eliyingqophamlando lobuciko bobumba buka-Rorke’s Drift bubukiswa endaweni yokungena yoMtapo wolwazi eMalherbe esikhungweni sase-UKZN eHoward College.

UMotsamayi uhlanganise izinhlelo zenqophamlando lapho izitsha zobumba zithwetshuliwe kwaphinde kwahlolwa isiqu somsebenzi wezitsha zobumba ukuhlonza kanye nokubheka izinto ezibalulekile njengezinto okwenziwa ngazo izitsha zobumba, ubumba, ukwenziwa kwalo, ukushisela, imifanekiso yokuhlobisa kanye nokuqonda isitayela sazo kanye nezinto ebonakala ngazo ngezithombe noma ngemifanekiso uma uqhathanisa nezifundo ezikhona ezifundisa ngokufanayo.

Ukuvakashela ezindaweni okusetshenzelwa kuzo ngobumba esikhungweni i-Rocke’s Drift Art and Craft Centre kumhlinzeke ngethuba lokucubungula isiqu sendawo yokusebenza ngobumba, i-Pottery Workshop kanye nendawo yomlando.

Uthe iqoqo likaBernstein liqukethe ikakhulu izitsha eziwukhamba bese kuthi ezinepuleti zehluke. Izinhlobo zomdabu ezibhalwe ngezilimi zomdabu kanye nemifanekiso yokuhlobisa izitsha zitshelekwe kumasiko akuleli (isiZulu kanye neSesotho), amacansi, ubuhlalu kanye nokwalukwa kwezimbenge. Izitayela kanye nezinhlobo eziseRorke’s Drift zithathelwe ebudlelwaneni bamasiko asekhaya kanye nawamanye amazwe, inhlanganisela edalwe umfanekiso ophindiwe wokuhlobisa kanye namaphethini. 

Phakathi nesethulo sakhe, wembula ukuthi ‘Iqoqo likaBernstein lingase libonakale njengendlela yokubonisa amasiko ahlukahlukene okwenza kube lula ukuvumelana kokubonisa okubukwayo phakathi kwemiphakathi yobuciko. Umbukiso wemisebenzi yobumba ye-Rorke’s Drift Ceramic eMtapweni wolwazi wase-UKZN ukhombisa izilimi zomdabu zendawo, izinsumansumane, izindaba zasendulo, izindaba ezixoxwayo, kanye nezindaba zezinganekwane. Inkundla yeNyuvesi inikeze amaciko ukubonakala emphakathini wakithi wezemfundo, ekukhuthazeni ukuqwashisa ngomsebenzi wawo kanye nefa lobuciko eliqhubekayo.’

UMotsamayi wenze isincomo sokuthi ‘i-UKZN ihloniphe igugu layo elicebile lobuciko kanye nokubaluleka kwayo yonke imisebenzi engagciniwe ngendlela, ukuba icwaninge ngokugcwele futhi ifakwe kwesizindalwazi wonke amaqoqo ukuze inikeze uhlu olusha lwamaqoqo omlando. Isizindalwazi senyuvesi i-University Collections kufanele sibe yingxenye yokuphathwa kweqoqo.’

Unethemba lokuthi izethulo zakhe zizoqhubela phambili izifundo ngolwazi lomdabu kanye nezinto zamasiko emaqoqweni omphakathi. Ubonge Isikole sezoBuciko ngoxhaso lwaso lwemali ukuze akwazi ukugcina izindleko zokuhamba ukuba abe yingxenye yengqungquthela kanye nozakwabo ngokumlekelela ngezinhlelo zezemfundo.

Umbhalo: ngu-Melissa Mungroo

Isithombe: Sithunyelwe